એશિયન ટીમ બેડમિન્ટન ચૅમ્પિયનશિપમાં ભારતને કાંસ્ય ચંદ્રક

એશિયન ટીમ બેડમિન્ટન ચૅમ્પિયનશિપમાં ભારતને કાંસ્ય ચંદ્રક
સેમિ ફાઇનલમાં ઇન્ડોનેશિયા સામે રસાકસી બાદ 2-3થી હાર
મનીલા (ફિલિપીન્સ) તા.16: યુવા શટલર લક્ષ્ય સેનના એશિયન ગેમ્સ ચેમ્પિયન ખેલાડી જોનાથન ક્રિસ્ટી સામેના જોરદાર વિજય છતાં ભારતીય પુરુષ બેડમિન્ટન ટીમને એશિયન ટીમ બેડમિન્ટન ચેમ્પિયનશિપમાં સેમિ ફાઇનલમાં ગત વિજેતા ઇન્ડોનેશિયાની ટીમ સામે 2-3થી હાર મળી હતી. આથી ફરી કાંસ્ય ચંદ્રકથી સંતોષ માનવો પડયો હતો. 
દુનિયાના સાતમા નંબરના ઇન્ડોનેશિયાના ખેલાડી જોનાથન ક્રિસ્ટીને ભારતના 19 વર્ષીય અને વિશ્વમાં 31મો ક્રમ ધરાવતા લક્ષ્ય સેને અપસેટ કરીને બીજા સિંગલ્સ મેચમાં 21-18 અને 22-20થી હાર આપી હતી. પહેલા સિંગ્લસ મેચમાં સાઇ પ્રણિત એન્થોની જિનટિંગ સામે 6-21થી પાછળ રહયા બાદ રિટાયર્ડ હર્ટ થયો હતો. ડબલ્સમાં ભારતીય જોડી ધ્રુવ કપિલા-અર્જુન રસાકસી પછી ત્રણ સેટના મુકાબલા બાદ હારી હતી. શુભાંકર ડેએ ત્રીજા સિંગલ્સ મેચમાં ઇન્ડોનેશિયાના ખેલાડી શેસાર હિરેનને 21-17 અને 21-15થી હાર આપીને સ્કોર 2-2ની બરાબરી પર લાવી દીધો હતો. નિર્ણાયક ડબલ્સના મેચમાં ભારત તરફથી ચિરાગ શેટ્ટી અને લક્ષ્ય સેન ઉતર્યાં હતા, પણ તેમને દુનિયાની નંબર વન જોડી માર્કસ ફર્નાલ્ડી-કેવિન સંજયા સામે 6-21 અને 13-21થી હાર મળી હતી. આથી ભારતનો સેમિ ફાઇનલમાં ઇન્ડોનેશિયા સામે 2-3થી પરાજય થયો હતો. ભારતીય બેડમિન્ટન ટીમને સતત બીજી વખત એશિયન ટીમ ચેમ્પિયનશિપમાં બ્રોન્ઝ મેડલથી સંતોષ માનવો પડયો હતો.

Published on: Mon, 17 Feb 2020

© 2020 Saurashtra Trust

Developed & Maintain by Webpioneer