લંડન, તા.4 : એફઆઇએચ પ્રો લીગના ગઇકાલે રમાયેલા રસાકસીભર્યાં મુકાબલામાં ભારતીય પુરુષ હોકી ટીમનો બ્રિટન વિરુદ્ધ શૂટઆઉટમાં 4-2 ગોલથી રોમાંચક વિજય થયો હતો. નિર્ધારિત સમયમાં બન્ને ટીમ 4-4 ગોલની બરાબરી પર રહી હતી. ભારત તરફથી કપ્તાન હરમનપ્રિત સિંઘે સાતમી, મંદિપ સિંધે 19મી, સુખજીત સિંઘે 28મી અને અભિષેકે 50મી મિનિટે ગોલ કર્યાં હતા જ્યારે હરીફ ટીમ બ્રિટન તરફથી 8મી, 40મી, 47મી અને 53મી મિનિટે ગોલ થયા હતા.
આ જીતથી ભારતને એક બોનસ પોઈન્ટ મળ્યો છે અને પોઇન્ટ ટેબલ પર બ્રિટન પછી બીજા સ્થાને છે. ભારતના 12 મેચમાં 24 અને બ્રિટનના 11 મેચમાં 26 પોઇન્ટ છે. ભારતીય ટીમ આ પહેલા પહેલા રાઉન્ડના મેચમાં બ્રિટન સામે 2-4થી હારી હતી. આ પછી શાનદાર વાપસી કરીને ઓલિમ્પિક ચેમ્પિયન બેલ્જિયમ સામે 5-1 ગોલથી વિજય હાંસલ કર્યો હતો.
બ્રિટન સામે પેનલ્ટી શૂટ આઉટમાં ભારત તરફથી મનપ્રિત, હરમનપ્રિત, લલિત કુમાર અને અભિષેકે ગોલ કર્યાં હતા.
